Хөрмәтле коллегаларым! Мин сезне шәхси сайтымда күрүемә бик шатмын.  

Үзем турында: мин 1996нчы  елда Арча педагогия көллиятен, 1999нчы елда Казан дәүләт педагогика университетын тәмамладым. Эш стажымны 1996нчы елда Казан шәһәренең 40нчы мәктәбендә татар теле һәм әдәбияты укытучысы буларак башладым. Бүгенге көндә Авиатөзелеш районының 33нче мәктәбендә хезмәт куям. Әлеге мәктәп “Шатлык мәктәбе” буларак билгеле. Яңа, заман таләпләренә туры килерлек итеп җиһазландырылган, искиткеч коллективы булган мәктәптә эшләвемә мин бик шатмын.

Укучыларымда туган телебезгә, әдәбиятыбызга мәхәббәт тәрбияләргә тырышам. Яңалыкка омтылып яшим. Традицион технологияләр белән беррәттән яңа  метод һәм алымнар кулланып укытуга да зур игътибар бирәм. Тәҗрибә алмашырлык материалларым да бар.  Әлеге максатларны күз алдында тотып, интернет челтәре киңлекләренә  аяк  басарга булдым.